ប្រធានសហភាពសហព័ន្ធយុវជនកម្ពុជា (ស.ស.យ.ក) បានបង្ហោះសារ អះអាងថាសហព័ន្ធលោកមិនបានរៀបចំបញ្ជីឈ្មោះសមាជិកដែលត្រូវប្រលងសញ្ញាបត្រមធ្យមសិក្សាទុតិយភូមិ ឱ្យទៅក្រសួងអប់រំ យុវជន និងកីឡា នោះទ។

ប្រធានសហភាពសហព័ន្ធយុវជនកម្ពុជា (ស.ស.យ.ក) លោក ហ៊ុន ម៉ានី បានបង្ហោះសារតាមរយៈបណ្តាញសង្គមនៅថ្ងៃទី៥ ខែធ្នូ ឆ្នាំ២០២២ បង្ហាញការភ្ញាក់ផ្អើលនិងសោកស្តាយចំពោះបុគ្គលមួយចំនួនដែលបង្ហោះសារថា ស.ស.យ.ក បានរៀបចំបញ្ជីរាយនាមសមាជិក-សមាជិកាដែលត្រូវប្រលងសញ្ញាបត្រមធ្យមសិក្សាទុតិយភូមិ ឱ្យទៅក្រសួងអប់រំ យុវជន និងកីឡា ហើយលោកបានបដិសធថាមិនមានករណីនះកើតឡើងនោះទេ។

លោកបានសរសេរថា៖ «ខ្ញុំមានការភ្ញាក់ផ្អើល ហើយមានការសោកស្តាយជាខ្លាំង ដែលមានបុគ្គល ក៏ដូចជាក្រុមអគតិ ទុច្ចរិតមួយចំនួន ដែលបង្ហោះសារថា ស.ស.យ.ក បានរៀបចំបញ្ជីរាយនាមសមាជិក សមាជិកា ស.ស.យ.ក ដែលត្រូវប្រឡងបាក់ឌុប ផ្ញើរទៅក្រសួងអប់រំ យុវជន និងកីឡា»។

លោកបានបន្តទៀតថា កន្លងមក ស.ស.យ.ក តែងតែចូលរួមយ៉ាងសកម្មជាមួយរាជរដ្ឋាភិបាលកម្ពុជាលើកស្ទួយវិស័យអប់រំ ហើយក្នុងនាមលោកជាប្រធានស.ស.យ.ក និងជាពលរដ្ឋមួយរូប លោកក៏ចង់ឃើញការប្រលងបាក់ឌុប ប្រកបដោយប្រសិទ្ធិភាព និងតម្លាភាពខ្ពស់ហើយធ្វើយ៉ាងណាឱ្យប្រកបដោយភាពជោគជ័យយុត្តិធម៌ ទទួលយកបាន ដោយផ្អែកលើពាក្យស្លោក «អ្នកចេះគឺជាប់»។

លោកក៏បានបញ្ជាក់ទៅដល់អាណាព្យាបាល សិស្សានុសិស្សគ្រប់រូបថា ស.ស.យ.ក នឹងទទួលខុសត្រូវចំពោះមុខច្បាប់ប្រសិនបើមានការប្រព្រឹត្តខុសឆ្គងណាមួយទៅលើច្បាប់និងលិខិតបទដ្ឋាននានាពាក់ព័ន្អនឹងការប្រលងបាក់ឌុបនេះ។

គួរបញ្ជាក់ផងដែលថា សហភាពសហព័ន្ធយុវជនកម្ពុជា (ស.ស.យ.ក) ក៏ធ្លាប់បានចូលរួមសង្កេតការណ៍ការប្រឡងបាក់ឌុប នាពេលរឹតបន្តឹងការប្រឡង តាំងពីឆ្នាំ២០១៤មក៕